Policia Kufitare e Rinasit, së bashku me Interpol Tiranën, kanë arrestuar një shqiptar i cili ishte shpallur në kërkim nga drejtësia italiane.
40-vjeçari shqiptar ishte dënuar nga drejtësia italiane me 12 vite burg, por për t’iu shmangur dënimit, shqiptari kishte ndërruar emrin.
Domi Vuksani akuzohet për veprat penale “Organizatë kriminale” dhe “Trafik i lëndëve narkotike”.
Ai është arrestuar sapo ka zbritur në aeroportin e Rinasit, edhe pse e kishte ndërruar emrin në Nikel Vuksani.
I lindur në Shkodër, shtetasi Domi Vuksani ishte i shpallur në kërkim ndërkombëtar nga Interpol Roma në vitin 2014, pasi Gjykata e Firences e ka dënuar me 12 vjet burg për veprat penale “Organizatë kriminale” dhe “Trafik i lëndëve narkotike”.
Autoritetet shqiptare do të bëjnë të mundur edhe ekstradimin e 40-vjeçarit në shtetit italian.
