Ditën e sotme, zëdhënësja e Operacionit Forca e Ligjit në një deklaratë për mediat, tha se ish-kreut të bandës së Durrësit, Lulzim Berisha, i është kërkuar deklarimi i pasurisë brenda 48 orëve.
Avokati i Berishës, në një prononcim për “Balkanweb”, tha se e gjitha është zhurmë mediatike dhe nuk ka asnjë kërkesë në drejtim të klientit të tij.
Sipas avokatit, pronat e klientit të tij janë sekuestruar dhe tashmë i ka shteti në pronësi.
Më tej ai bën me dije, se ish-kreu i bandës së Durrësi posedon në bar kafe me qira, ku është taksapagues i rregullt dhe një autobot që shpërndan naftë për anijet.
“Prej ditës që ka dalë nga burgu, Lulzim Berisha ka në posedim të tij, një bar kafe me qera, të pajisur me numër NIPT-i dhe kryen rregullisht pagesat e taksave, si edhe një autobot që shpërndan naftën për anijet, gjithashtu konform ligjit”, u shpreh avokati.
Avokati tha gjithashtu, se që prej ditës së lirimit, klienti i tij mban kontakte me shërbimin e provës.
Edhe motra e Lulzim Berishës, Luljeta Berisha, ka reaguar pas njoftimit të OFL. Ajo është shpreh se pasuritë e vëllai të saj janë sekuestruar nga shteti, ndërsa vetë asaj i janë kthyer pronat me vendim të Gjykatës së Lartë.
“Burgun e perjetshëm e ka hequr Gjykata e Lartë. Pasurite e tij janë të sekuestruara dhe të kaluara në emër të shtetit me vendim të gjykatës se Krimeve të Rënda. Ndërsa unë kam vendimin e Gjykatës së Lartë që më janë kthyer ato prona në emer tim dhe kam dhe pafajsi po nga ajo gjykatë për sa i përket akuzës për pastrim parash”, deklaron motra e Lul Berishes.
