Presidenti i Ukrainës Volodymyr Zelensky ka reaguar në lidhje me kërcënimin që Presidenti i Rusisë Vladimir Ptuin bëri disa ditë më parë në lidhje me përdorimin e armëve bërthamore në rast nevoje.
“Ndoshta dje ishte blof. Tani, mund të jetë një realitet”, tha Zelensky për CBS në një intervistë që u transmetua të dielën. “Unë nuk mendoj se ai po bën blof.”
Kujtojmë se Presidenti rus njoftoi një përshkallëzim ushtarak javën e kaluar gjatë një fjalimi kombëtar, në një përpjekje për të forcuar fushatën ushtarake të Moskës në Ukrainë.
Ai bëri thirrje për rritjen e rekrutimit ushtarak, me ministrin e mbrojtjes Sergei Shoigu që konfirmoi më vonë se vendi do të thërrasë 300,000 rezervistë për të shërbyer në konflikt – një strategji që tashmë është përballur me reagime në formën e protestave të nxehta në vend.
Duke trajtuar përdorimin e mundshëm të armëve bërthamore, Putin paralajmëroi se “ata që përpiqen të na shantazhojnë me armë bërthamore duhet të dinë se erërat mbizotëruese mund të kthehen në drejtimin e tyre”.
Pas komenteve të Putinit javën e kaluar, Zelensky tha se Rusia po përpiqej të shfrytëzonte okupimin e saj të termocentralit bërthamor Zaporizhzhia në Ukrainën jugore.
“Ai dëshiron të trembë gjithë botën. Këto janë hapat e parë të shantazhit të tij bërthamor”, tha ai.
“Unë mendoj se bota po e frenon dhe po e frenon këtë kërcënim. Ne duhet të vazhdojmë të ushtrojmë presion mbi të dhe të mos lejojmë që ai të vazhdojë.”
