Çështja e votave të diasporës, në veçanti ato që kanë ardhur nga Greqia, ka ndezur përplasjet mes Partisë Demokratike dhe Partisë Socialiste, duke përfshirë edhe institucionet zgjedhore si KQZ dhe KAS.
Partia Demokratike ngriti dyshime për parregullsi në votat që vijnë nga Greqia dhe kërkoi pezullimin e numërimit të tyre.
Fillimisht, Komisioni Qendror i Zgjedhjeve pranoi kërkesën dhe vendosi të ndërpresë përkohësisht numërimin e zarfeve nga ky shtet, duke vijuar me ato të vendeve të tjera.
Vendimi u mor për shkak të pretendimeve të PD-së për anomali në procesin e votimit nga Greqia. Por më pas, KQZ vendosi që numërimi të vijonte për të gjitha shtetet, duke veçuar përkohësisht votat nga Greqia.
Kjo lëvizje u kundërshtua nga Partia Socialiste, e cila e ankimoi vendimin në Komisionin e Ankimimeve dhe Sanksioneve, duke e konsideruar atë të paligjshëm.
Në fund, KAS vendosi shfuqizimin e vendimit të KQZ-së dhe urdhëroi që të numërohen votat e diasporës pa përjashtim, përfshirë ato nga Greqia.
Megjithatë, përplasjet politike mbi këtë çështje vijojnë ende.
