Në një kohë që Shqipëria kërkon të forcojë pozitat ndërkombëtare, kryeministri Edi Rama po shndërron sistemin diplomatik në një zgjatim personal të pushtetit të tij. Përmes një skeme të mirëmenduar, fillimisht emëron besnikët e partisë në poste diplomatike, më pas i përdor këta ambasadorë për të organizuar takime elektorale me diasporën, duke shkelur hapur ligjin që kërkon paanësinë e tyre politike.
Takimi i fundit në New York është dëshmia më e qartë e kësaj skeme. Katër ambasadorë shqiptarë u shfaqën në krah të kryeministrit në një aktivitet politik me emigrantët shqiptarë. Por kjo është vetëm maja e ajsbergut. Një varg takimesh të ngjashme po zhvillohen në Itali, Gjermani, Greqi e gjetkë, ku ambasadorët e emëruar nga Rama shërbejnë si organizatorë të fushatës së tij elektorale.
Praktika e ‘qokave’ diplomatike në qeverisjen Rama ka arritur përmasa alarmante. Rasti më skandaloz është ai i ish-deputetit socialist Ervin Bushati. Historia e tij është emblematike për mënyrën se si funksionon sistemi i “shpërblimeve” në qeverisjen Rama. I shkarkuar nga drejtimi i Postës Shqiptare për shkak të aferave korruptive pas vetëm 6 muajsh në detyrë, Bushati u “shpërblye” me postin e ambasadorit në SHBA.
Jo vetëm kaq, por iu dhanë akreditime edhe për pesë vende të tjera – Meksikë, Panama, Republikë Domenikane, Guatemala dhe Kosta Rika. Një ‘çek i bardhë’ diplomatik për një individ të shkarkuar për shpërdorime, tendera të dyshimtë dhe pushime luksoze me para publike.
Emërimet problematike vijojnë me rastin e Mustafa Nanos si ambasador në Zvicër dhe Lihtenshtein. Një vendim që shkel hapur ligjin nr. 23/2015 “Për Shërbimin e Jashtëm të Republikës së Shqipërisë”. Sipas këtij ligji, për t’u emëruar ambasador, një diplomat duhet të ketë kaluar nëpër të gjitha gradat diplomatike dhe të ketë shërbyer si drejtues misioni diplomatik për të paktën dy mandate, me një total prej jo më pak se gjashtë vjetësh. Nano nuk plotëson asnjë nga këto kritere themelore ligjore, duke e bërë emërimin e tij një shembull tjetër të shkeljes sistematike të ligjit në sistemin diplomatik.
Edhe ish-ministrja Eglantina Gjermeni u shpërblye me postin e ambasadores në OSBE, ndërsa dy zëvendësministrat aktualë të Punëve të Jashtme, Artemis Malo dhe Besart Kadia, po kalojnë direkt nga kabinetet qeveritare në postet diplomatike në Kanada dhe Azerbajxhan. Të gjitha këto emërime bien ndesh me ligjin që kërkon profesionalizëm dhe paanësi politike në shërbimin diplomatik.
Shifrat flasin vetë për kapjen sistematike të diplomacisë nga pushteti. Nga 54 përfaqësitë diplomatike të Shqipërisë, një e treta e ambasadorëve janë emëruar pa përmbushur kriteret ligjore të statusit diplomatik. Mbi 20 ambasadorë vazhdojnë të qëndrojnë në detyrë përtej mandatit tre-vjeçar, ndërsa 12 prej tyre vijnë direkt nga karriera aktive politike në PS.
Por Rama nuk ndalet me kaq. Për të ligjëruar këtë praktikë të paligjshme, qeveria ka përgatitur një projektligj të ri që zgjat mandatin e ambasadorëve në katër vjet dhe heq kriteret profesionale për emërimin e tyre. Më shqetësuese, projektligji dobëson rolin mbikëqyrës të Parlamentit, duke i dhënë kryeministrit dorë të lirë në emërime.
Shkelja e ligjit 23/2015 për Shërbimin e Jashtëm është e qartë dhe sistematike. Jo vetëm që ambasadorët po marrin pjesë hapur në aktivitete partiake, por po përdorin edhe resurset e ambasadave për të organizuar fushatën e PS-së në diasporë. Sipas Kodit Penal, këto veprime përbëjnë vepër penale që dënohet deri në tre vjet burgim.
Edhe OSBE ka paralajmëruar vazhdimisht për keqpërdorimin e burimeve shtetërore në fushatë, por paralajmërimet bien në vesh të shurdhër. Ndërkohë që pjesëmarrja e ambasadorëve në aktivitetet elektorale të Ramës vazhdon hapur, duke treguar se kryeministri po e kthen diplomacinë shqiptare në një degë të partisë së tij, në kundërshtim të plotë me çdo parim të shtetit ligjor.
/gazetareforma.com
