Kardinali shqiptar Ernest Troshani ka komentuar emocionet e tij lidhur me zgjedhjen e Papës së ri, Leoni XIV, në krye të Vatikanit.
Ai theksoi se besimtarët katolikë dhe mbarë bota tani kanë një Papë të ri të fuqishëm, 69 vjeç, të cilin e cilësoi si “mëkëmbës të Krishtit”.
“Papa është mëkëmbës i Krishtit. Votuam për zgjedhjen e një Pape të ri, të fuqishëm, 69-vjeçar, që është kardinali i Çikagos. Ky ka pasur edhe gjatë kohës së Papa Françeskut detyra të rëndësishme dhe është i njohur në mbarë botën. Është i pari Papë nga komuniteti amerikan,” tha Troshani.
Ai e cilësoi zgjedhjen e Papës Leoni XIV si një moment gëzimi të madh për katolikët, duke theksuar se ai do të sjellë udhëheqjen dhe fuqinë e Krishtit.
“Papa është mëkëmbës i Krishtit. Ky Papa do të jetë udhëheqësi dhe shpresa për katolikët dhe gjithë botën,” tha Troshani.
Kardinali gjithashtu vlerësoi kontributin e Papa Françeskut për shqiptarët, duke kujtuar momentet kur ai ka treguar mbështetje të fortë për popullin shqiptar.
“Papa Françesku, e keni parë vetë, që ka qenë me dëshirën më të madhe për shqiptarët. E pamë që para pesë muajsh, kur ishim bashkë, brohoriti: ‘Rroftë populli shqiptar, rroftë Shqipëria’. Papa Leoni XIV do t’i sjellë botës atë paqe të dëshirueshme për të pajtuar zemrat e njerëzve”, tha Troshani.
