Një karantinë e dytë do kishte pasoja fatale për ekonominë, ndërkohë, që sipas INSTAT, ekonomia shqiptare humbi nga karantina 570 milionë euro në gjysmën e parë të vitit.
INSTAT publikon shifrën për ecurinë ekonomike të tremujorit të dytë 2020, që përkon me kulmin e pandemisë. Sipas INSTAT, ekonomia ra me 10.2% me bazë vjetore dhe 8.8% në krahasim me tremujorin e mëparshëm. Sektori më i goditur ishte “Tregti, transport, akomodim dhe shërbim ushqimor”, që ra me -28% me bazë vjetore.
Sipas INSTAT, në vlerë absolute, Prodhimi i Brendshëm Bruto (PBB) në tremujorin e dytë 2020, ishte rreth 387 miliardë lekë (3.12 miliardë euro), ose 59 miliardë lekë më i ulët se e njëjta periudhë e një viti më parë.
Në tremujorin e parë, humbjet në rënien e PBB-së janë rreth 70 milionë euro në krahasim me tremujorin e parë 2019, duke bërë që në total, ekonomia të gjenerojë 570 milionë euro më pak në gjashtë muajt e parë të vitit, në raport me janar-qershor të 2019-s. Humbja është edhe më e lartë, teksa në kohë normale, nëse nuk do të ishin aplikuar kufizimet e Covid-19, ekonomia vendase pritej të rritej me 3-4%.
Në tremujorin e dytë, Prodhimi i Brendshëm Bruto me çmimet e tregut zbriti në nivelin më të ulët që nga viti 2016.
Sektori që është goditur më shumë është “Tregtia; transporti; aktivitetet e akomodimit dhe shërbimit ushqimor”, që ka humbur rreth 150 milionë euro, për shkak të mungesës së udhëtimeve, anulimit të prenotimeve të turistëve.
Sektori i dytë më i goditur është industria, me humbje gati 100 milionë euro, nga të cilat industria përpunuese rreth 40 milionë euro.
Ndërsa, nga dita e sotme, në Shqipëri, të gjithë do të duhet të vënë maska, edhe në ambientet jashtë, si një masë për parandalimin e përhapjes së Covid-19.
“Ishte parashikuar që me ardhjen e vjeshtës, numrat do të fillonin të rriteshin, por ndërsa në disa vende po rikthehen masat shtrënguese dhe po rishfaqet kërcënimi i një karantine të përgjithshme, ajo që ne duhet me çdo kusht të përpiqemi dhe të parandalojmë është një karantinë e përgjithshme. Një karantinë e përgjithshme e dytë do të ishte tejet e vështirë për vendin, ekonomitë e shumë familjeve dhe shtetin” deklaroi Rama para disa ditësh.
Ekonomia pritet të bjerë të paktën me -7.5% këtë vit, sipas FMN-së, -8.4% .
/GazetaReforma.com/
