Nuk është e lehtë për asnjë qeveri apo lider botëror që të vendosë për një “lockdown” të dytë, të shtyrë prej valës së re të koronavirusit, për më tepër për një vend si Britania e Madhe ku shtetasit e saj njihen për rebelimin ndaj rregullave.
Në këtë situatë gjendet aktualisht edhe kryeministri britanik, Boris Johnson, i cili është nën një presion në rritje për të zbatuar një bllokim kombëtar anti-COVID-19.
Por ndërkohë numri i rasteve të koronavirusit po rritet në Britani dhe autoritetet lokale po vazhdojnë të shprehen kundër sistemit të tij të ri, me tre nivele.
Shumë spitale britanike janë mbingarkuar nga pandemia dhe së shpejti, mund të mos jenë më në gjendje të trajtojnë fluksin e pacientëve me COVID-19.
Sipas sistemit të ri të Johnson, i cili përshkruan tre nivele të ndryshme kontrollesh, pothuajse 28 milionë persona po jetojnë nën kufizime të shtuara, që nga e shtuna, më shumë se gjysma e popullsisë.
Këshilltarët shkencorë dhe partia opozitare e laburistëve, kanë bërë thirrje për një bllokim kombëtar, mbylljen e vendit për vetëm disa javë, por Johnson ka përjashtuar çdo bllokim mbarëkombëtar.
/GazetaReforma.com/
