Profesori i kriminalistikës, Ervin Karamuço, komentoi në emisionin “Top Story” në Top Channel, 5-vjetorin e krijimit të SPAK.
Ai u ndal te deklaratat e kreut të SPAK, Altin Dumani, i cili theksoi se “familja e Dumanit është kërcënuar”, ndërsa përmendi se presionet ndaj prokurorëve të Prokurorisë së Posaçme janë të shumta dhe përfshijnë kërcënime të drejtpërdrejta ndaj familjeve të tyre.
“Zoti Dumani në fjalën e tij e përmendi që ‘ne jemi rrezikuar jo vetëm vetë, por edhe familjet tona’. Ka raste që nuk janë bërë publike. Di t’ju them për një rast ku janë sot të angazhuar forca ligjzbatuese të vendeve evropiane për të mbajtur dhe ruajtur fëmijët e prokurorëve të SPAK, jo vetëm në Shqipëri, por edhe jashtë vendit. Pse? Sepse janë kërcënuar haptazi.
Më së shumti kërcënimet i kanë fëmijët që ndjekin shkolla jashtë. Në një rast konkret, një fëmijë që studion jashtë është fotografuar dhe fotot i janë dërguar nënës së tij. Duhet të ketë pasur kërcënime serioze.
Tani fokusi janë zarfet që futen. Ka pasur eksperienca me zarfe që shpërthejnë. Fakti që ka masa të shtuara sigurie tregon se sinjalet janë shtuar dhe rrezikshmëria është rritur”, u shpreh Karamuço.
