Regjisori, aktori dhe karikaturisti, Bujar Kapexhiu ka qenë i ftuar sot mëngjes në “Abc News”.
Ai ka komentuar shembjen e Teatrit Kombëtar, ku aktin e ka quajtur një goditje të shëmtuar dhe se ligësia vinte nga lart.
Në fjalën e tij Kapexhiu shtoi se teatri mund të kthehej në kompleks teatror e të mos shembej si u bë, e njëjta gjë siç u kursye edhe Bashkia e Tiranës, ku madje u shtua në pjesën e mbrapme të godinës.
Këtu ka ironizuar edhe gjatësinë e kryeministrit Rama, i cili asokohe ka qenë kryetar bashkie në Tiranë.
“Duke qenë shtat i lartë këmbët i dilnin jashtë dhe shtoi pjesën pasme të Bashkisë”, u shpreh me ironi Kapexhiu për Ramën.
“Dy godinat duhet të ruheshin, të restauroheshin dhe mund të qëndronin fare mirë.
Kam qenë i mendimit se këtyre dy teatrove u mungonin shumë ambiente dhe besova që duke qenë me këto mangësi midis tyre të lidheshin me një arkitekturë mund të krijoheshin të gjitha ambientet që mungonin.
Mund të kishim një kompleks teatror. Kemi shembuj në Tiranë.
Ishte Bashkia, u bë kryetar Bashkie Edi Rama, mesa duket duke qenë shtat i lartë këmbët i dilnin jashtë dhe shtoi pjesën pasme të Bashkisë.
Shembulli më i bukur është Banka, ishte në gjysmë harku u bë edhe gjysmë harku tjetër dhe u bë në mënyrë rrethore, mjediset u shtuan brenda stilit. Përse të mos bëhej edhe kjo për teatrin?
Kapexhiu foli edhe për dhunën në protestë të cilën e quajti të paperceptueshme.
“Këta e kanë cilësuar veten shërbëtor, por në fakt janë kthyer në pronarë. Gjatë protestës kishte ndërhyrje të dhunshme. U sulën ndaj grave, ndaj vajzave.
Më duket e papranueshme, e gjithë ajo egërsi. Me këta policë duhet të jesh i zemëruar. Kur shikoj tani një polic në rrugë, i bëj pyetjen vetes,- po ky a ka qenë te teatri?
I shikoj me përçmim, më duket një njeri i dhunshëm”, u shpreh ndër të tjera regjisori.
