Gjatë ditës së sotme në pikën kufitare të Hanit të Hotit, në Mal të Zi doganierët dhe punonjësit e policisë kapën disa thasë me hashash.
Nga informacionet jozyrtare të “Vijesti”, në këtë pikë kufitare është realizuar me sukses sekuestrimi i drogës. Aktivitetet e koordinuara të Drejtorisë së të Ardhurave dhe Doganave dhe Drejtorisë së Policisë në pikën kufitare Hanit të Hotit në një kamion me targa shqiptare, mes mallrave të tjera (bimë të thata medicinale), gjetën lëndë bimore të dyshuar si lëndë narkotike hashash.
Kamioni me ngarkesën e deklaruar si bimë medicinale, po lëvizte nga drejtimi i Shqipërisë dhe duhej të vazhdonte rrugën drejt BE-së.
Policia e Shtetit:
Në Malin e Zi është kapur një kamion, brenda të cilit, autoritetet doganore dhe policore të Malit të Zi, kanë gjetur një sasi lënde narkotike cannabis sativa. Nga veprimet e para hetimore të përbashkëta të kryera nga autoritetet doganore dhe policore të Malit të Zi dhe të Policisë së Shtetit, paraprakisht rezulton se kamioni ka kaluar nga pika e kalimit kufitar Hani i Hotit, Shkodër. Grupi hetimor i ngritur në Policinë e Shtetit po vazhdon kryerjen e veprimeve procedurale në territorin e vendit tonë, duke koordinuar veprimet me palën malazeze. Informacion më të detajuar do japim në përfundim të veprimeve të para hetimore.
