Pas seancës së të hënës, mazhoranca ka kërkuar masë disiplinore për gjashtë deputetë të Partisë Demokratike, të cilët vazhduan aksionin opozitar, që prej disa kohësh nuk po lejon punimet e rregullta në Kuvend.
Në kërkesën e deputetëve socialistë të dërguar në Kryesinë e Kuvendit, kërkohet masë për deputetët Flamur Noka, Elda Hoti, Albana Vokshi, Gazment Bardhi, Edi Paloka, madje dhe për Sali Berishën.
Socilaistët pretendojnë se veprimet e këtyre deputetëve bien në kundërshtim me rregulloren e brendshme të Kuvendit.
Kujtojmë se të hënën deputeti Flamur Noka ndezi disa flakadanë duke shkaktuar kaos dhe rrëmujë në sallë, madje ai hodhi flakadanë edhe drejt kryetares së Kuvendit, Lindita Nikolla. Këto flakadanë ai i mori nga deputetet Elda Hoti dhe Albana Vokshi. Por, edhe dy deputetet në fjalë ndezën disa flakadane ku disa prej tyre i vendosën poshtë karrigeve mbi foltore.
Deputeti Gazmend Bardhi pengoi zhvillimin e rregullt të seancës plenare duke shkaktuar rrëmujë në sallë. Gjithashtu, pranë deputetit të PS-së zotit Koçi u afrua edhe deputeti Edi Paloka i cili tentoi ta godiste.
Ndërsa, Sali Berisha pengoi zhvillimin e rregullt të seancës plenare duke zaptuar foltoren e Kuvendit, duke shkaktuar kaos në sallë.
