Bllokimi prej pesë ditësh i aksit Librazhd-Përrenjas po shkakton pasoja të rënda për qarkullimin dhe ekonominë e familjeve në juglindje të vendit. Udhëtimi është zgjatur ndjeshëm, kostot janë rritur, ndërsa lëvizja drejt disa qyteteve është paralizuar pothuajse plotësisht.
Itinerari Tiranë Korçë, që më parë përshkohej për rreth 3 orë, tashmë zgjat mbi 4 orë. Sipas operatorëve, në varësi të trafikut dhe ngarkesës në segmentet alternative, koha e udhëtimit është shtuar nga 1 orë deri në 1 orë e 20 minuta. Devijimi i detyruar përmes Elbasan Cërrik Gramsh Maliq ka rënduar ndjeshëm qarkullimin.
Kryetari i Shoqatës së Transportit Ndërqytetës, Dashnor Memaj, tha se furgonat dhe autobusët vijojnë transportin drejt Korçës dhe Pogradecit, por me itinerare të ndryshuara. Ai sqaroi se drejt Përrenjasit lëvizja aktualisht nuk funksionon për shkak të fluksit shumë të ulët të pasagjerëve.
Në terminalin e Juglindjes në Tiranë nuk ka ndryshim oraresh për nisjet drejt Korçës dhe Pogradecit, por linja për Përrenjas është pezulluar. Sipas Memajt, edhe drejt qyteteve të tjera të juglindjes numri i pasagjerëve ka rënë ndjeshëm. “Operatorët po i lëvizin mjetet me 3 apo 4 pasagjerë”, thekson ai.
Përballë mungesës së aksesit të drejtpërdrejtë, shumë qytetarë po detyrohen të ndjekin itinerarin përmes Dibrës së Madhe, duke kaluar nga Tirana në Klos, Bulqizë, Maqellarë, kalimi i kufirit me Maqedoninë e Veriut, Dibër e Madhe, Strugë dhe më pas në Përrenjas. Ky itinerar kërkon siguracion të mjetit për kalimin kufitar dhe, nëse fëmijët udhëtojnë me një prind, edhe prokurë kalimi, duke shtuar procedurat dhe kostot.
Një qytetare, N.K., tregoi për Monitor se u detyrua të ndiqte këtë rrugë për shkak të një fatkeqësie familjare. Ajo sqaroi se përpara nisjes duhej të pajisej me akt noterial për kalimin e fëmijëve në pikën doganore dhe me siguracion për mjetin. “Rruga më shkoi 3 orë”, tha ajo.
Një tjetër alternativë kalon përmes zonave rurale, nga fshati Spathar drejt Dardhës, në një segment me zhavorr, kthesa të forta dhe pjerrësi të theksuar, që kërkon kujdes maksimal dhe rrit rrezikun gjatë qarkullimit. Pas kalimit të zonës malore, automjetet zbresin në Hotolisht dhe lidhen sërish me rrugën nacionale drejt Përrenjasit, Pogradecit dhe Korçës.
Rritja e vështirësive ka sjellë edhe rritje të çmimeve. Për linjën Tiranë Përrenjas, bileta nga 500 lekë ka arritur në 1 mijë lekë. Për linjën Tiranë Korçë, çmimi nga 700 lekë ka shkuar në 800, 900 apo deri në 1 mijë lekë, deri në 40 për qind më shtrenjtë se më parë.
Memaj tha se nuk ka raportim për ndryshim zyrtar të çmimeve, pasi ato përcaktohen me VKM të Ministrisë së Infrastrukturës në bazë të kilometrave të përshkruara, megjithëse mund të ketë raste të izoluara abuzimi.
Sipas burimeve në terren, aktualisht po udhëtojnë kryesisht persona me nevoja emergjente, ndërsa shumë qytetarë kanë shtyrë lëvizjet për shkak të kohës së zgjatur dhe kostove të shtuara.
Drejtori i Agjencisë Kombëtare të Mbrojtjes Civile, Haki Çako, deklaroi në konferencë për shtyp se institucioni është në mbështetje të Autoritetit Rrugor Shqiptar për menaxhimin e situatës, e cila ka sjellë impakt të drejtpërdrejtë në qarkullimin rrugor dhe jetën e komunitetit në qarqet Elbasan dhe Korçë.
“Agjencia Kombëtare të Mbrojtjes Civile ka qenë në komunikim të vazhdueshëm dhe në gatishmëri të plotë për përballimin e çdo urgjence, përfshirë urgjencat mjekësore. Të gjitha institucionet e përfshira në menaxhimin e situatës janë koordinuar për të garantuar reagim të shpejtë dhe minimizim të rrezikut për qytetarët. Përmes një vendimi të Këshillit Teknik pritet të ndërhyhet konkretisht për zgjidhjen e situatës së krijuar”, tha Çako.
Ministri i Mbrojtjes, Pirro Vengu, deklaroi se pas shembjes së urës te “Arrat e Gurrës”, procesi është bërë publik dhe është në fazë vendimmarrjeje për ndërtimin e një aksi të ri, me fokus sigurinë dhe jetën e banorëve, si dhe lehtësimin e aksesit në rast emergjencash.
Ndërkohë, situata në terren vijon të mbetet e tensionuar, me qytetarë që përballen çdo ditë me vonesa, kosto të rritura dhe pasiguri në lëvizje.
