Kur kanë mbetur vetëm tre ditë nga përfundimi i afatit për të aplikuar në Policinë e Shtetit për punonjës të rolit bazë, që do të jenë Patrulla e Përgjithshme dhe ministri Bledi Çuçi, iu ka bërë thirrje të rinjve që të aplikojnë për t’u bërë pjesë.
Çuçi iu ka bërë Apel gjatë një takimi që ka realizuar me studentët e Patrullës së Përgjithshme në Policinë e Shtetit, të cilët kanë nisur praktikën pranë Drejtorisë Vendore në Tiranë.
Ministri ndër të tjera u shpreh se ulja e moshës mesatare të policisë, dhe investimet në teknologji mbeten një prioritet i qeverisë, për të rritur kështu cilësinë e shërbimit ndaj qytetarëve dhe forcën goditëse ndaj paligjshmërisë.
“Integriteti në punë shënohet që në ditën e parë. Bëjnë karrierë në Policinë e Shtetit ata që kanë integritet të lartë moral dhe profesional. Niseni karrierën tuaj me synimin për të mos humbur asgjë nga integriteti. Mos u gënjeni nga modele të mbrapshta që prishin karrierën tuaj që në momentet e para.
Brezi juaj dhe të tjerët që do të përzgjidhen nga aplikimet e reja, do të ripërtërijë më tej trupën e Policisë së Shtetit. Ne jemi në një fazë që duam ta ulim akoma moshën mesatare në Policinë e Shtetit dhe po investojmë gjithashtu në teknologji të lartë”, tha ministri Çuçi.
