Legjenda e futbollit italian, Paolo Rossi, ka mbyllur sytë përgjithmonë në moshën 64-vjeçare.
Rossi, i cili udhëhoqi ekipin kombëtar drejt fitores në Kupën e Botës në vitin 1982, vuante prej kohësh nga një sëmundje.
Bashkëshortja e futbollistit postoi në llogarinë e saj në Instagram një foto të çiftit duke shkruar “Përgjithmonë”.
Megjithatë, ajo nuk e bëri të ditur shkakun e vdekjes së legjendës së futbollit italian.
Gjatë karrierës së tij në futboll, Rossi është cilësuar si një prej lojtarëve më të mirë, i cili fitoi Këpucën e Artë dhe Topin e Artë gjatë kampionatit botëror të vitit 1982 në Spanjë.
Në botërorin Spanjë 82’, me 6 golat e tij u bë golashënuesi më i mirë. Ai ishte pa diskutim ylli i Kupës së Botës në atë kompeticion.
Rossi arriti të shënonte për të kaltrit në ndeshjet më të rëndësishme, tre gola ndaj Brazilit të Zicos, dy gola ndaj Polonisë së Bonjekut në gjysmëfinale, si dhe një gol ndaj RF Gjermane të Rumeniges në finale.
Në vitin 2004, italiani u cilësua si një prej futbollistëve më të mirë që ishin ende gjallë./Gazetareforma.com/
