Kampet e refugjatëve në Shëngjin dhe Gjadër të Lezhës, vijojnë ende të mos jenë gati. Prej muajsh thuhet se punimet për qendrën pritëse në portin e Shëngjinit po shkojnë drejt fundit, por deri tani asgjë nuk ka përfunduar, ndërkohë që qeveria përtej Adriatikut, sa herë që vihet në vështirësi dhe i duhet t’i përgjigjet interesit të publikut, përgjigjet duke u shprehur: “Mungon edhe shumë pak” ose në rastin tjetër “Po kryhen kontrollet e fundit” etj etj. Tashmë prej disa javësh në Lezhë ka mbërritur edhe policia italiane, të cilët do të dislokohen në Shëngjin për të garantuar sigurinë e refugjatëve. I fundit që ka reaguar në lidhje me këtë çështje ka qenë ministri Ministri i Brendshëm, Matteo Piantedosi i cili është shprehur se në Tetor këto qendra do të jenë gati. E ndërkohë që tashmë jemi në muajin tetor, sërish asgjë nuk duket në horizont. Mediat italiane, së fundmi kanë nisur të shikojnë edhe me më shumë dyshim zhvillimet e qeverisë Meloni, në lidhje me këtë çështje. “La Republica” së fundmi i ka dedikuar një shkrim kësaj çështjeje, duke u përqëndruar në disa pika kyçe. Mbi të gjitha, procesi i transferimit të emigrantëve nga Italia drejt Shëngjinit, menjëherë të ngjallë dyshime. Kjo sa i përket mënyrës se si ata do të transportohen drejt Shqipërisë, me çfarë dhe kush e ka marr përsipër këtë detyre. Sipas medias italiane, për këtë rast nuk u hap asnjë tender që kompanitë e ndryshme të shprehnin interes dhe të jepnin oferta për të bërë transportimin e emigrantëve në brigjet shqiptare, me shpenzimet e vlerësuara deri në 1.5 milionë për vetëm 90 ditë.
Mungesa e një gare solli për rrjedhojë që asnjë anije private, asnjë një ide e paparashikuar nga kushtet e marrëveshjes nuk flet për mundësin e përdorjes së anijeve ushtarake italiane si një mjet për të transportuar emigrantë.
Gjithçka ka ngrirë!
Në Ministrinë e Brendshme nuk japin më data. E lodhur duke u përgjigjur, që nga maji me: “çështje disa javësh. Por shtatori tashmë ka përfunduar dhe projekti për Shqipërinë nuk ka nisur ende. Ministri i Brendshëm, Matteo Piantedosi ende shpreson t’u paraqitet kolegëve të G7-ës të thirrur në 2 tetor në Mirabella Imbaccari, për të folur mbi të gjitha për strategjitë për të luftuar trafikimin e emigrantëve, me dyert e pikës së nxehtë të Shëngjinit dhe qendrën e paraburgimit për aplikantët në Gjader të hapura përfundimisht.
Radhë të gjata për të shkuar në Shqipëri
Një çështje mjaft interesante që ngre “La Republica”, është ajo e forcave të rendit, që do të kujdesen për sigurinë e kampeve të refugjatëve në Lezhë.
Në pritje të dritës jeshile për kampet, në Itali ka një radhë për të shkuar në Shqipëri. Policia, karabinierët, oficerët e burgjeve, janë në garë për misionin e artë i cili tashmë i kushton buxhetit të shtetit shuma të kota por të konsiderueshme që prej muajit qershor. Rreth 30,000 euro në ditë, 900,000 euro në muaj.
Mijëra kërkesa janë marrë tashmë nga organet e ndryshme të përfshira në përzgjedhjen e rojeve të cilët kërkojnë të bëjnë të paktën një turn në Shqipëri: 100 euro mision në ditë plus ushqim dhe akomodim, për momentin për të vëzhguar strukturat boshe dhe në të ardhmen për të mbajtur nën vëzhgim emigrantët në qendrën e paraburgimit ose, nëse dikush përfundon atje, në burgun e vogël me 24 vende ku do t’u garantohet trajtimi që asnjë burg italian nuk ka: 3 roje burgu për çdo të burgosur për një proporcion që në ferrin e burgjeve italiane përmbyset, një polic për çdo tre të burgosur.
Ato që kanë nisur, dhe jo pa protesta dhe rezerva, janë ato që ministri i Brendshëm Piantedosi i cilëson si provat e zbatimit të procedurave të përshpejtuara kufitare, të cilat më pas do të duhet të zbatohen plotësisht në qendrat e Shqipërisë që mbeten një mirazh.
Me datën e hapjes që vijon ende të zvarritet, dhe me refugjatët e parë që ende pritet të vijnë, duket se Lezha me dy kampet, në Shëngjin dhe Gjadër, është kthyer në qendrën e vëmendjes së mediave përtej Adriatikut dhe në të njëjtën kohë në ‘tokën e premtuar’ për policët karabinierët apo oficerët e burgjeve në Itali.
