Një ngjarje e rëndë ka ndodhur mëngjesin e sotëm në Austri ku tre vajza të vogla janë gjetur të pajeta në banesën e tyre në Vjenë.
Autoritetet vendase thonë se ishte e ëma e vajzave që telefonoi rreth orës 5:30 duke thënë se sapo kishte vrarë tre vajzat e saj dhe do të vriste dhe veten.
Oficerët shkuan në apartament ku edhe arrestuan gruan, e cila u gjet me disa plagë. Vajza 8-muajshe dhe ajo 3-vjeçare u gjetën pa shenja jete, ndërkohë që vajza tjetër, 9-vjeçare, ndonëse u dërgua me urgjencë në spital, nuk mundi dot të shpëtonte.
Mbetet ende e paqartë se ç’arsye e shtynë gruan t’u merrte jetën vajzave, ndërkohë që mësohet se babai i tyre jeton diku tjetër, po në Vjenë.
Ndërkohë hetimet vazhdojnë për të zbardhur detaje rreth kësaj ngjarje tronditëse, pasi për momentin 31-vjeçarja nuk është në gjendje të mirë për të hedhur më shumë dritë në lidhje me këtë situatë.
