Kryeministri britanik, Boris Johnson, ka kaluar natën e dytë në terapi intensive.
Sipas raportimeve të fundit, gjendja e tij shëndetësore është e qëndrueshme, shkruan “CNBC”.
Johnson u shtrua në spitalin “St. Thomas” në Londër të hënën, pasi gjendja e tij u përkeqësua për shkak të koronavirusit.
Boris Johnson u konstatua me COVID-19 më 27 mars, por ai u paraqit në spital të dielën e shkuar, pas temperaturës dhe kollës të vazhdueshme.
Konferenca e përditshme qeveritare, ditën e djeshme u mbajt nga Ministri i Jashtëm, Dominic Raab, i cili bëri me dije se Johnson nuk ishte intubuar dhe merrte frymë vetë.
Në Britaninë e Madhe të martën u shënuan 786 viktima nga COVID-19, shifra më e madhe që nga nisja e epidemisë, ndërsa numri i të vdekurve në total shkoi në 6159.
Britania numëron 55.242 të prekur nga koronavirusi, me vetëm 135 të shëruar.
Zyrtarët britanikë shprehen se ka mundësi që tashmë kurba të vijë në zbritje.
