Në një postim në rrjetin e tij social në Facebook mjeku Tritan Kalo ka reaguar duke shprehur kritika të forta ndaj kryeministrit të vendit Edi Rama dhe Erion Veliajt. Ai ka treguar një shqetësim në lidhje me situatën dhe kushtet që janë katandisur autobuzët në Tiranë, ku përveçëse vonojnë në stacion janë edhe të mbingarkuar duke u bërë kështu një burim kryesor i përhapjes së infeksioneve të reja me koronavirus.
Mjeku Kalo u kërkon që të merren me situatën në linjat e autobusëve, pasi qytetarët janë taksapagues të rregullt, por ndihen si në Kabul kur jetojnë në Tiranë.
Postimi i plotë:
“Kohë kovidiane….26.08.2021….Zotërinj KM/ER dhe KB/EV. Ju mirëkuptoj për brengosjen ndaj Afganëve të sotëm, POR mos na nënvlerësoni edhe ne “ish Afganët e para 30 viteve”…. Nëse doni t’a nisni ditën me nerva të cingërisura, ju ftoj të merni me mua çdo mëngjes linjën e Unazës për të shkuar në punë….E keni të garantuar pritjen më së paku 30 minuta në stacion, autobuza pa kondicioner që edhe breshka do t’ua kishte zili për “ecjen e tyre”, mbingarkesën në pasagjerë duke rritur rrezikun e transmetimit të virusit Sars-Cov2/Covid-19, etj, etj…. Mirë uji që na mungon nëpër çezma, pluhuri e papatërtia që gëlojnë kudo dhe kurdoherë, POR së paku të ndiheshim të mirëtrajtuar dhe mirëkuptuar si qytetarë taksapagues të rregullt në Kabulin/ Tiranën tonë….Ju falemimderit për mirëkuptimin tuaj edhe në këtë rast!!!!”, shkruan Kalo.
