Një tentativë grabitjeje me armë zjarri tronditi paraditen e kësaj të enjteje kryeqytetin, pasi një person i armatosur me kallashnikov hyri në një bankë të nivelit të dytë në zonën e ish parkut të autobusëve në Tiranë dhe qëlloi me armë brenda ambienteve. Autori u arrestua në flagrancë nga policia, ndërsa fatmirësisht nuk pati persona të lënduar.
Sipas informacioneve paraprake, i dyshuari hyri në bankë i armatosur dhe qëlloi një herë në tokë me qëllim frikësimin e stafit, duke kërkuar dorëzimin e parave. Të shtënat shkaktuan panik mes punonjësve dhe klientëve që ndodheshin në ambientet e brendshme.
Punonjësit njoftuan menjëherë policinë dhe brenda pak minutash në vendngjarje mbërriti patrulla e Komisariatit Nr. 2. Efektivët ndërhynë duke bërë të mundur arrestimin në flagrancë të autorit dhe sekuestrimin e armës së zjarrit tip kallashnikov.
Burime bëjnë me dije se i arrestuari është Bardhyl Fusha, 58 vjeç, me origjinë nga Librazhdi dhe banues në Tiranë. Sipas të dhënave, 58 vjeçari është sipërmarrës në fushën e ndërtimit dhe ka qenë i proceduar disa herë pas denoncimeve nga klientët për mosshlyerje pagesash.
Dyshohet se ai ka borxhe të pashlyera dhe se për këtë arsye ka ndërmarrë këtë akt. Ndërkohë, policia po vijon hetimet për të zbardhur plotësisht rrethanat dhe motivet e ngjarjes.
Autoritetet pritet të japin një njoftim zyrtar me detaje të plota, ndërsa ndaj të arrestuarit do të rëndojnë akuza për armëmbajtje pa leje dhe tentativë grabitjeje me armë.
