Anëtari i kryesisë së Partisë Demokratike, Fatbardh Kadillli ka shpallur kandidaturën për kreun e PD-së. Në një dalje publike ai sërish ka kërkuar largimin e kryetarit aktual Lulzim Basha, ndërsa thotë se projekti i tij nuk i solli demokratëve fitoren.
Më tej Kadilli është shprehur se për kandidimin nuk ka pse të konsultohet me askënd përveç se me vullnetin e tij. Gjithashtu ai ka thënë se zgjedhjet në PD kanë një afat statuor deri në 23 korrik të këtij viti.
Ai ka thënë se vjedhja e Ramës nuk është alibi për dështimin e Bashës dhe nuk mund të përdoret edhe si alibi për të mos luftuar Ramën.
“Jam këtu për ti kërkuar edhe njëherë Lulzim Bashës dorëheqjen. Projekti i ekipit të tij u provua i paaftë për të prodhuar fitore për demokratët. Si i tillë ka shteruar dhe nuk jep më opsione për të ardhmen. E kemi mbështetur me vetëmohim për të na drejtuar në fitore. Nuk ia doli, nuk diti, dështoi. Sot të gjithë mund të gjejmë justifikime për dështimin, por jo faktin që jemi para 4 vjet e 4 muaj në opozitë dhe nuk dimë se çfarë na pret. Sot kush thërret Rama ik nuk mund të thërrasë Basha rri. Vjedhja e Ramës nuk është alibi për dështimin e Bashës dhe dështimi i Bashës nuk mund të jetë alibi për të mos luftuar Ramën”, u shpreh Kadilli.
Ndër të tjera Kadilli ka shtuar se kërkesa për dorëheqje nuk ka lidhje me hakmarrjen, por me faktin që dështimi i Bashës është i përsëritur.
“Unë nuk kam pasur hakmarrje, por kur shoh një dështim të përsëritur, kur një rrugë e ke provuar dhe dështon nuk ke pse e provon më, aq më tepër për herë të tretë. Nuk bëhet fjalë për shqetësime të natyrës emocionale, por politike”, u shpreh Kadilli.
