Fatbardh Kadilli ka pranuar humbjen në zgjedhjet për kryetar të PD. Gjithsesi, Kadilli tha se nuk do ta urojë Bashën për fitoren. Sipas Kadillit, Basha ka detyrë ta udhëheqë PD-në drejt fitores. Kadilli tha se beteja e tij do të vijojë në PD dhe se nuk ka ndërmend të krijojë një parti të re të tijën.
“Jam krenar që në partinë time, jo për interesin tim, ndeza shkëndijën e parë të gares. Më shumë se garë ishte një sfidë. Kjo sfidë tregoi që opozita nuk ishte ekskluziviteti i askujt. Ata që votuan dhe ata që nuk votuan.
Nuk jam këtu për të përligjur rezultatin tim apo për të shprehur keqardhje për fitoren e Lulit. Për atë flasin më mirë ato që keni parë vetë. Patë pabarazi, dhe kohë shumë të shkurtër. Patë një kryetar që nuk lëshoi zyrën. Patë demokratë që nuk gjenin emrin në listë dhe fenomene të ndryshme,.
Para shqiptarëve ofruam një garë po jo standarte. Unë nuk jam Luli, unë e pranoj këtë rezultat dhe vendimin e demokratëve”, u shpreh Kadilli.
Sipas rezultateve paraprake, Basha ka grumbulluar 32 mijë e 882 vota, ndjekur nga Agron Shehaj me 6 mijë e 38 vota, Edith Harxhi me 991 vota dhe Fatbardh Kadilli me 763 vota.
