Presidenti i vendit, Ilir Meta i ka kërkuar informacion Prokurorisë, për 16 emrat e kabinetit të ri qeveritar. Me anë të një shkrese , Meta ka kërkuar informacion nga Prokuroria përpara se ai të hedhin firmën për dekretim. Ai kërkon të dijë nëse ndonjërin prej tyre ka procese hetimore apo penale që janë nisur apo mund të jenë në fazë vlerësimi.
Presidenti i bën thirrje Prokurorisë që nëse ka informacione t’i përcjell sa më parë në Presidencë, pa cenuar sekretin hetimor që mund të kenë. Po ashtu në shkresë theksohet se emërimi duhet të bëhet brenda shtatë ditëve nga presidenti.
“Nëse për këta shtetas disponon informacione të kësaj natyre, pa cënuar sekretin hetimor kërkojmë që të informohemi mbi gjendjen e procedimit dhe statusin e secilit prej shtetasve të mësipërm. Lutemi, që ky informacion të na përcillet brenda një kohe sa më të shpejtë, pasi siç ju e dini sipas nenit 98 të Kushtetutës, Presidenti i Republikës do të duhet të shprehet mbi këto emra brenda 7 ditëve nga administrimi i propozimit prej kryeministrit”, mbyllet shkresa e Presidentit Meta.
Sjellim në vëmendje se përpara disa ditësh, kryeministri Edi Rama në mbledhjen e Asamblesë së PS-së, zbuloi emrat e propozuar si ministra të rinj. Ndryshimet ishin të pakta krahasuar me qeverinë e mëparshme, ndërsa ra në sy se pjesa më e madhe e kabinetit përbëhej nga ministre femra.
