Pasditen e djeshme persona të paidentifikuar qëlluan me breshëri kallashnikovi, drejt mjetit ku ndodhej prokurori Arjan Ndoja, së bashku me ‘të fortin’ e Sukthit, Landi Muharremin dhe shoferin Andi Maloku.
Ndoja dhe Muharremi janë jashtë rrezikut për jetën, ndërsa Maloku ndodhet në gjendje të rëndë.
Sipas ‘Balkanweb’, shoferi ka marrë plumba në mushkri dhe në shtyllën kurrizore.
Orët në vazhdim do të jenë vendimtare, pasi nga momenti në moment mund të ketë përkeqësim të situatës.
Jashtë derës së spitalit qëndrojnë dy patrulla policie dhe një automjet i forcave ‘Shqiponja’.
‘Ka plumba në të dy anët e mushkërive, një plumb ka prekur shtyllën kurrizore, duke e bërë që të humbasë ndjeshmërinë e trupit. Personi po mbahet nën mbikëqyrje 24 orë në 24 në reanimacionin e spitalit dhe orët në vazhdim do të jenë vendimtare për jetën e Andi Malokut. Sipas mjekëve duhet të kalojë një farë kohe që mjekët të shprehen më qartë se si do të vijojë gjendja e tij shëndetësore pasi mund të ketë një përkeqësim të momentit që mund të ndryshojë rrjedhën e situatës. Pra deri në momentin që flasim këto janë të dhënat që ne kemi mundur të sigurojmë nga burime brenda spitalit. Ne nuk kemi ende një prononcim të një prej kirurgëve që e ka parë dhe ka kryer operacionin e Andi Malokut. Siguria e shoferit të prokurorit Arjan Ndoj është në maksimum pasi në spital vijojnë të qëndrojnë jashtë derës, dy patrulla policie dhe një automjet i forcave Shqiponja. Por kordoni i policisë që ka qenë dje nuk është më, nuk janë më ato masa të sigurisë me antiplumb dhe me armë e kallashnikov’, tha gazetari Erjon Skëndaj.
I vetmi që është marrë në pyetje është prokurori Arjan Ndoja.
Ky i fundit ka mohuar të ketë qenë shënjestra e atentatit, ndërsa ka sqaruar se gjithçka ka ndodhur shumë shpejt.
