Prokurori i Prokurorisë së Përgjithshme, Arben Kraja u zgjodh sot nga KLP si drejtues i SPAK.
Në votimin me dyer të mbyllura, Kraja mori 6 vota, 2 më shumë sesa Dumani, ndërsa Kondili mori vetëm një votë.
Pro tij votuan Eugen Beci, Vatë Staka, Kristaq Beluri, Bujar Sheshi, Nurihan Seiti dhe Alfred Balla.
Arben Kraja në të shkuarën ka hetuar kreun e PD, Lulzim Basha për aferën në Rrugën e Kombit.
Gjithashtu ai ka pasur në duar, dosjen e deputetit Armando Prenga, për incidentin në lagunën e Patokut.
Kraja ka hetuar gjithashtu gjyqtaren Majlinda Andrea, për rryshfetin prej 50 mijë euro në këmbim të një vendimi për pronat në Sarandë.
Së fundmi ai po heton kandidatin socialist për Shkodrën, Valdrin Pjetri, i cili akuzohet për falsifikim në formularin e dekriminalizimit.
Në seancën e Vettingut të zhvilluar më 13 dhjetor të 2018-ës, Kraja rezultoi se kishte burime të ligjshme për pasurinë e tij.
Ai zotëron dy banesa, një në Shkodër, trashëgimni nga prindërit dhe një në Tiranë.
Gjithashtu ai ka marrë pesë kredi, 4 prej të cilave i ka shlyer, ndërsa e pesta është në proces.
Kredia e fundit lidhet me një sipërfaqje toke në Gjirin e Lalëzit në Durrës.
Deri më tani Kraja ka shlyer 15 mijë euro, ndërsa vlera totale e kredisë është 130 mijë euro.
Pikat e forta në përzgjedhjen e tij ishin eksperienca në drejtimin dhe menaxhimin e burimeve njerëzore.
