Parashqevi Simaku, një nga figurat më të njohura të muzikës shqiptare, ka dhënë një intervistë të rrallë për gazetarin Blendi Fevziu, e realizuar në New York, qyteti ku këngëtarja ka jetuar gjatë viteve të fundit, shpesh në kushte të vështira.
Ajo ka befasuar me deklaratën e saj, duke theksuar se mënyra e jetesës që ka zgjedhur nuk ishte rezultat i rrethanave, por një vendim i vetëdijshëm.
“Pse mos të rrija jashtë? Isha jashtë sepse zgjodha të jem. Në atë kohë, qindra amerikanë ishin jashtë si unë. Kishim vende ku mund të shkonim, por unë zgjodha të isha jashtë. Ishte e imja. E quaj një pjesë të mirë të jetës sime, absolutisht.”
Jetoja në Times Square. Për ushqim kishte shumë organizata që kujdeseshin për ne. Të jetosh si e pastrehë është një zgjedhje. Çdo ditë dhe çdo natë kishte organizata që na jepnin batanije dhe përpiqeshin të na çonin në strehimore, por shumica nuk donin të shkonin. Si shtëpi të përhershme mund të them Starbucks – aty më njihnin të gjithë. Shkoja, flija në mëngjes dhe qëndroja ngrohtë kur ishte ftohtë. Pija nga 3-4 kafe në ditë, të gjitha falas. Atyre iu dukej e çuditshme që unë isha gjithmonë shumë e sjellshme,” u shpreh këngëtarja.
