Në protestën e 15-të para Bashkisë së Tiranës, aktori i njohur Mehdi Malkaj ka mbajtur një fjalim të zjarrtë përpara protestuesve, duke shprehur zemërimin dhe zhgënjimin e tij për gjendjen e vendit. Në fjalën e tij, Malkaj theksoi problemet e mëdha me të cilat përballet Shqipëria, përfshirë moralin, arsimin dhe shëndetësinë.
“Unë do të futem aty mes policëve që të çaj kordonin policor. Të jeni të sigurt që unë nuk rrah dot njeri dhe po më rrahën do tu mbetëm në dorë,” tha Malkaj.
Aktori gjithashtu kritikoi ashpër premtimet e pambajtura të qeverisë: “Jemi shumë keq me moralin. Jemi shumë keq me arsimin dhe shumë keq me shëndetësinë, këto ishin pikat kryesore që ky i shkëlqyeri na premtoi në vitin 2013.” Malkaj theksoi se këto fusha jetësore kanë pësuar përkeqësim të vazhdueshëm, pavarësisht premtimeve të bëra nga qeveria.
Ai gjithashtu ngriti pyetjen përse nuk ka më shumë njerëz që protestojnë për këto çështje: “Po përse nuk del njeri për këto që të protestojë pasi ka gënjyer të tërë popullin mbarë.”
