Klodian Duro, ish-futbollist i Kombëtares, i cili ka fituar 4 herë Kampionatin e Shqipërisë, dhe 3 herë Kupën dhe Superkupën ka marrë sot drejtimin e ekipit të Drenasit në Kosovë.
Në lidhje me postin e tij të ri si trajner i Feronikelit, Duro tha dëshiron të fitojë gjithçka me këtë ekip me futobollista shumë cilësor.
“Jam shumë i kënaqur që jam këtu sot në Drenas dhe sigurisht nuk mund ti thoja jo ofertës së presidentit Naser Ramaj. E falënderoj për besimin e treguar ndaj meje. Jam gjendur shumë mirë bashkë me të gjithë pjesëtarët e klubit me zv/presidentin Rakip Veseli dhe drejtorin Artan Berisha dhe Malësor Gjonbalajn. Dje kemi qëndruar për një kohë bashkë. Jam këtu si në shtëpinë time. Uroj të gjithë bashkë të bëjmë më të mirën, jam i nderuar që jam në një nga klubet më të mëdhenj të Kosovës që ka fituar tituj kampionë dhe synon gjithmonë majën në futbollin e Kosovës.
Kemi një grup shumë të mirë futbollistësh, prandaj unë besoj se do ta kthejmë Feronikelin aty ku i takon. E falënderoj Tovërlanin për gjithçka që ka bërë për ekipin dhe për rezultatet që ka marrë. Të gjithë bashkë të rikthehemi sa më shpejt te rezultatet pozitive dhe në fund të renditemi në majë dhe të fitojmë gjithçka”, deklaroi trajneri i ri i Feronikelit Klodian Duro.
Profesionin e trajnerit e filloi menjëherë pas pensionimit nga futbolli aktiv, duke marrë drejtimin e Kukësit, klub me të cilin arriti ta fitonte Kupën e Shqipërisë në sezonin e tij të parë.Por Duro ka drejtuar edhe skuadrat si Kamza e Luftëtari.
