Pas përshkallëzimit të tensioneve në Lindjen e Mesme, fluturimet mes Shqipërisë dhe Izraelit janë pezulluar përkohësisht.
Paralelisht, Ministria e Jashtme izraelite ka urdhëruar mbylljen e të gjitha misioneve diplomatike në mbarë botën, përfshirë ambasadën në Shqipëri, si pjesë e masave të sigurisë së shtuar.
Në një deklaratë zyrtare, autoritetet izraelite njoftojnë se janë pezulluar të gjitha shërbimet konsullore dhe se qytetarët izraelitë që ndodhen jashtë vendit duhet të plotësojnë një formular online për të raportuar vendndodhjen dhe statusin aktual, me qëllim koordinimin e ndihmës në rast emergjence.
“Për shkak të zhvillimeve të fundit, misionet izraelite në të gjithë botën do të mbyllen dhe nuk do të ofrohen shërbime konsullore deri në një urdhër të dytë,” thuhet në njoftim. Në rast nevoje urgjente, qytetarëve u kërkohet të kontaktojnë menjëherë Dhomën e Situatave të Ministrisë së Jashtme izraelite.
Po ashtu, janë shpërndarë disa udhëzime sigurie për qytetarët izraelitë që ndodhen jashtë vendit, ku përfshihen:
• Shmangia e shfaqjes së simboleve izraelite apo hebraike në publik.
• Mospublikimi i informacionit për vendndodhjen apo planet e udhëtimit në rrjetet sociale.
• Shmangia e pjesëmarrjes në ngjarje ose grumbullime që lidhen me Izraelin apo komunitetet hebraike.
• Bashkëpunimi me forcat lokale të sigurisë dhe ndjekja e udhëzimeve në rast të ndonjë incidenti.
• Rritja e vigjilencës në hapësirat publike.
• Përdorimi i kontakteve emergjente të publikuara në faqet zyrtare të misioneve diplomatike.
