Më 18 maj, ushtria izraelite nisi një ofensivë të re tokësore në pjesët veriore dhe jugore të Rripit të Gazës, të koduar si “Operacioni Karrocat e Gideonit”.
Kjo lëvizje ushtarake ndodh në një moment kur Egjipti dhe Katari, me mbështetjen e SHBA-ve, po përpiqen të rikthejnë në tryezë negociatat për një armëpushim mes Izraelit dhe Hamasit.
Situata humanitare në Gaza është bërë alarmante. Sipas Ministrisë së Shëndetësisë të kontrolluar nga Hamasi, të gjitha spitalet publike në veri janë jashtë funksionit.
Spitali i fundit që operonte në këtë zonë, ai Indonezian është mbyllur pas bombardimeve intensive dhe rrethimit nga ushtria izraelite, duke bllokuar hyrjen e personelit dhe furnizimeve mjekësore.
Mungesa e ilaçeve, ushqimeve dhe karburantit ka zhytur civilët palestinezë në një krizë të thellë mbijetese.
Gjatë 24 orëve të fundit, të paktën 100 palestinezë kanë humbur jetën si pasojë e sulmeve ajrore izraelite.
Megjithëse bisedimet për një armëpushim vazhdojnë, ende nuk është shënuar asnjë përparim i dukshëm.
Kryeministri Benjamin Netanyahu ka shprehur gatishmëri për të diskutuar ndalimin e ofensivës, por e ka kushtëzuar këtë me eliminimin e Hamasit dhe çarmatimin e plotë të Gazës, kërkesa që e vështirësojnë çdo marrëveshje.
Sipas të dhënave të fundit nga autoritetet shëndetësore palestineze, vetëm gjatë javës së fundit janë regjistruar 464 të vrarë dhe mbi 1,400 të plagosur nga sulmet izraelite.
Ndërkohë, ndërhyrja ushtarake dhe mungesa e progresit diplomatik vazhdojnë të rëndojnë mbi popullsinë civile, që mbetet e izoluar dhe e pambrojtur përballë luftës 19-mujore.
