Vatrat e zjarrit kanë rrezikuar 4 fshatra në zonën e Zadrimës në Lezhë. Flakët kanë shkaktuar dëme materiale për banorët e zonës, shtëpi stalla të djegura si dhe dhjetëra hektarë tokë me pemtari. Flakët vijojnë ende që të jenë aktive në zonë, ku po digjet linja hekurudhore, ndërsa dëmet e shkaktuara janë të mëdha.
Një banore e zonës, shtëpia e të cilës është djegur nga zjarri shprehet se flakët erdhën shumë shpejt dhe shkrumbuan gjithçka për pak minuta. Ajo i bën apel shtetit për ndihmë.
“Ka qenë shtëpia e pleqeve, unë vet jam invalide. Kemi pas guzhinën këtu, pajisje të shtëpisë dhe kemi ndenjur këtu afër djalit. Asnjë gjë nuk ka mbetur dhe na ardhur flaka për 10 minuta dhe ka shkrumbuar çdo gjë, ka shkrumbuar pemtore dhe hardhia vetëm kemi shpëtuar si njerëz. Fëmijët po bërtisnin. Ka ardhur me sekonda dhe i shkrumboi të gjitha. Çfarë të keni mundësi që të na ndihmoni, na ndihmoni. Shtetit, kryeministrit i lutem të na ndihmojë”, tha ajo.
