Ujësjellësi i Tiranës ka pezulluar kontratën për familjet e prekura nga tërmeti i 26 nëntorit.
Në total 2200 familjeve u është pezulluar kontrata, ndërsa u janë falur faturat e ujit dhe taksat për muajin nëntor.
UKT mori vendimin pas verifikimit të ekspertëve, se banesat janë të pabanueshme.
Vendimi do të përfshijë edhe familje të tjera, nëse banesat e tyre shpallen të pabanueshme pas verifikimeve në terren.
Kujtojmë këtu se të njëjtën gjë bëri edhe Ujësjellësi i Durrësit disa ditë më parë.
UKD la afat deri në fund të janarit për personat e prekur nga tërmeti, që të mbyllin kontratën e furnizimit me ujë, pa pagesë.
Durrësi dhe Tirana ishin dy nga qytetet më të prekura nga tërmeti i 26 nëntorit.
Si pasojë e lëkundjeve të fuqishme të disa javëve më parë, mijëra qytetarë kanë humbur banesat e tyre dhe janë strehuar nëpër çadra dhe hotele.
