Autoritetet e Policisë së Sarandës vijojnë punën e tyre për kapjen dhe procedimin e personave që kryejnë vepra penale të ndryshme. Falë kontrolleve të kryera është bërë i mundur arrestimi i një 37-vjeçari, banues në qytetin e Sarandës, të cilit gjatë kontrollit nga forcat e policisë iu gjetën lëndë narkotike dhe mbante armë pa leje.
37-vjeçari është arrestuar nën akuzën e “Prodhim dhe shitje e lëndëve narkotike” dhe “Prodhimi dhe mbajtja pa leje e armëve të ftohta”.
Bëhet fjalë për shtetasin Flugert Lalaj i cili punonte si infermier në spitalin e Delvinës. Policia njofton se gjatë kontrollit në automjetin e tij iu sekuestruan: Kokainë, një përforcues grushti (dorezë metalike), dy mjete prerëse (thika) dhe një shkop metalik.
Materialet iu referuan prokurorisë, për veprime të mëtejshme.
Njoftimi i policisë:
Nga specialistët për Hetimin e Krimeve në Komisariatin e Policisë Sarandë u bë arrestimi në flagrancë i shtetasit F. L., 37 vjeç, banues në Sarandë, për veprat penale “Prodhimi dhe shitja e narkotikëve” dhe “Prodhimi dhe mbajtja pa leje e armëve të ftohta”, pasi gjatë kontrollit të ushtruar në automjetin e këtij shtetasi, u gjetën dhe u sekuestruan një sasi lënde narkotike e dyshuar kokainë, një përforcues grushti (dorezë metalike), dy mjete prerëse (thika) dhe një shkop metalik.
