Në qytetet kryesore të Europës ndotja e mjedisit është kthyer në një problem, por po aq e lartë është bërë edhe ndjeshmëria e qytetarëve që kërkojnë gjithmonë e më shumë nga autoritetet rritjen e kujdesit.
Në Milano të Italisë, qyteti i dytë për nga madhësia, mbrojtja e mjedisit është kthyer në kryefjalë, nisur edhe nga problemet që rajoni i Lombardisë ka me koronavirusin.
Për këtë, Këshilli i qytetit të Milanos miratoi, me 25 vota pro, 8 kundër, 4 abstenime dhe dy këshilltarë që nuk morën pjesë në votim, “Rregulloren për Cilësinë e Ajrit” e cila, ndër të tjera, fut në qytet nga 1 janari 2021 ndalimin e pirjes së duhanit në natyrë, përveç vendeve të izoluara.
Nga ndalesat e transportit publik në parqe, deri tek varrezat dhe objektet sportive, të tilla si stadiumet, pirja e duhanit do të ndalohet brenda 10 metrave nga njerëzit e tjerë.
Nga 1 janari 2025, ndalimi i pirjes së duhanit do të shtrihet në të gjitha mjediset e jashtme publike.
Përveç kësaj, pikat e karburanteve do të duhet të pajisen me infrastrukturë të karikimit elektrik deri në 1 janar 2023.
Në rast të pamundësisë teknike, kolonat e karikimit duhet të ndërtohen në një zonë publike, brenda 1 janarit 2023.
/GazetaReforma.com/
