Instituti i Shëndetit Publik ka dhënë sot disa këshilla për qytetarët, në lidhje me koronavirusin, duke qenë se në Shqipëri janë shënuar 6 raste.
Në një postim në Facebook, ISHP ka shpërndarë disa foto, nëpërmjet të cilave kërkon të rrëzojë disa mite për koronavirusin.
Sipas ISHP, maskat nuk na mbrojnë nga koronavirusi, por duhet të bëjmë kujdes me higjienën personale.
ISHP njofton se maskat janë efektive vetëm për personat që shfaqin simptomat e koronavirusit.
Gjithashtu marrja e pakove nga Kina nuk përbën rrezik për përhapjen e koronavirusit.
Përsa i përket racizmit dhe ksenofobisë, ISHP sqaron se nuk janë normale në situata të tilla.
Aktualisht në vendin tonë janë shënuar 6 raste me koronavirus.
Pacienti zero është një 28 vjeçar i cili kishte ardhur nga Firenze më 26 shkurt në rrugë tokësore.
Ai jetonte në Tiranë dhe ka infektuar babanë dhe 3 familjarë.
Pacienti i 6-të është një 31-vjeçar i cili kishte vizituar dajën në Milano, i cili ishte shtruar në spital.
