Instituti i Shëndetit Publik ka reaguar pas deklaratës së ish-deputetit, Bardh Spahia, duke thënë se kanë në dispozicion 90 mijë teste.
ISHP ka sqaruar se janë rreth 90 mijë teste të disponueshme për t’iu përgjigjur situatës së krijuar nga Covid19. Sipas këtij institucioni, në këtë situatë nuk duhet të bëhet politikë me koronavirusin, por t’i bashkohen përpjekjeve për ndërgjegjësimin e qytetarëve për respektimin e masave ndaj COVID-19.
Njoftimi i plotë
ISHP: Kemi kapacitetet e testimit
“Instituti I Shëndetit Publik vijon të jetë 24 orë në 7 ditë të javës në përgjigje të nevojave nga I gjithë vendi për testimet në kohë të qytetarëve të dyshuar, sipas hetimit epidemiologjik që kryhet në terren nga epidemiologët.
Aktualisht kemi rreth 90 mijë teste në dispozicion dhe laboratori I ISHP vijon të furnizohet pa ndërprerje. Stafi i ISHP-së po punon 24 orë pa ndërprerje që nga fillimi i epidemisë, për të nxjerrë sa më shpejt në kohë përgjigjet për të gjitha rastet e dyshura si të prekur nga Covid19.
I bëjmë thirrje PD dhe çdo force politike, të mos bëjnë politikë me Covid19 dhe të mos cënojnë punën e një ekipi të tërë të shëndetësisë, që janë në krye te detyrës për përballimin e situatës, por t’I bashkohen përpjekje për të rritur ndërgjegjësimin e qytetarëve për respektimin e rregullave të distancimit fizik, vendosjes së maskës dhe ruajtjes së higjienës”.
Ndërkohë që pak më parë ish-deputeti i Shkodrës së Partisë Demokratike Bardh Spahia ka reagur në lidhje me situatën e pandemisë dhe menaxhimin e saj nga ana e mazhorancës qeveritare. Spahia thotë se numri i kiteve që u jepet me racion spitaleve në qarqe të ndryshme të vendit është shumë herë më i ulët se kërkesa reale e qytetarëve për tamponë. Ish-deputeti i PD-së ndalet dhe tek propaganda qeveritare ku kamerat e ERTV-së paraqesin një gjendje të spitaleve shumë herë më larg problematikës reale që ato mbartin.
