Katër persona të tjerë u shpëtuan nga rrënojat rreth 60 orë pas tërmetit të fuqishëm me magnitudë 7.7 që goditi Mianmarin të premten, duke shkaktuar të paktën 1700 të vdekur.
Të mbijetuarit u nxorën nga një ndërtesë shkolle që u shemb në rajonin verior të Sagaing, sipas njoftimit nga shërbimi zjarrfikës i Mianmarit.
Përpjekjet e shpëtimit vazhdojnë, ndërsa shumë njerëz janë ende të zhdukur. Pavarësisht nisjes së shpëtimit që nga e premtja dhe mbërritjes së ndihmës ndërkombëtare, ka pasur vonesa për të arritur në zonat më të prekura, duke detyruar vendasit të tentojnë të nxjerrin të mbijetuarit vetë.
Një grua e moshuar u shpëtua të shtunën mbrëma në kryeqytetin e Mianmarit pas 36 orësh të bllokuar nën rrënojat e një spitali.
Po ashtu, 29 persona u shpëtuan nga një bllok apartamentesh që u shemb në Mandalay, siç njoftuan autoritetet lokale.
Ekipet ndërkombëtare të shpëtimit kanë marrë pjesë gjithashtu, me disa shtete që kanë dërguar ndihmë për Mianmarin.
Kina ka dërguar një ekip shpëtimi prej 82 personash, ndërsa India, Malajzia, Filipinet, Vietnami, Indonezia, Irlanda, Koreja e Jugut dhe Zelanda e Re gjithashtu po ofrojnë mbështetje me ekipe shpëtimi dhe furnizime emergjente.
