Ish-ministrja e Partisë Demokratike, Majlinda Bregu përshëndet krijimin e partisë “Lëvizja për ndryshim” të Jozefina Topallit. Duke komentuar situatën politike në News24, Bregu tha se “Vazhdoj të besoj që nuk ka keq, përveç se ka mirë, demokracia e një vendi, nëse qytetarët do të kenë më shumë alternativa. Na intereson që Shqipëria të ketë zgjedhje të mira, se do jenë test për integrimin”.
E pyetur nëse Shqipëria ka nevojë për rrotacion? Bregu deklaroi se “Vendi ka nevojë për lidership politik dhe që qytetarët të kenë rol në politikë, sepse kanë ndryshuar kohërat. Tani është kthyer ajo kur politikanët thonë se “është e mirë ajo që them unë”.
Bregu, e cila drejton Këshillin rajonal të bashkëpunimit të Ballkanit, foli edhe për pasojat që ka lënë pandemia e koronavirusit në ekonomi.
“Ka një situatë, e cila nuk mund të bëhet më e mirë para vitit 2022. Shpresoj që të kemi mundësi të gjithë të bëjmë vaksinën, që t’i rikthehemi normalitetit të lëvizjes, se sa i takon ekonomisë, do duhet kohë për rimëkëmbje”, tha Bregu.
Ajo iu drejtua me një mesazh dhe politikës shqiptare, teksa u shpreh se “Për mua Shqipëria do duhet t’i kishte hapur negociatat me kohë dhe fryma e kompromisit politik është një garanci. Askush nuk mund t’i shmanget përgjegjësisë që ka për të mos bllokuar procesin”.
E pyetur se si i vlerëson zgjedhjet e 25 prillit dhe situatën politike, Bregu tha se është “Një situatë problematike, dhe akoma më e rënduar sa i përket dhe virusit”.
/GazetaReforma.com/
