Eljus Thartori, ish-mësues i edukimit fizik në shkollën 9-vjeçare “Teli Ndini”, i dënuar paraprakisht me 10 vite burg për vrasje, është plagosur mbrëmjen e djeshme në Vlorë.
36-vjeçari ndodhet në gjendje të rëndë në spitalin e Traumës në Tiranë, për shkak të plagëve të shumta.
Mësohet se Thartori, në dëshminë e tij ka thënë për policinë se është plagosur pasi i ka plasur celulari në dorë, por grupi i hetimit dyshon se kanë qenë dy persona që kanë kryer plagosjen e 36-vjeçarit duke e qëlluar me breshëri arme.
Sakaq, në trupin e tij janë gjetur dhe copa metali, çka ka ngritur dyshimet se mund të ketë pasur dhe shpërthim lënde plasëse.
Deri më tani janë shoqëruar në polici 10 persona që mendohet se mund të kenë dijeni për ngjarjen e ndodhur ditën e djeshme rreth orës 19:20.
Policia po vijon hetimet për të zbardhur detaje të reja ndërkohë që mësohet se një nga pistat e hetimit përfshin të kaluarën e Thartorit, i cili është dënuar për një vrasje dhe armëmbajtje pa leje.
Burimi: Shqiptarja.com
