Komisioni i Pavarur i Kualifikimit ka shkarkuar nga detyra, gjytaren e Gjykatës së Apelit Tiranë, Shpresa Beçaj. Vendimi është marrë nga trupa gjykuese e përbërë nga Suela Zhegu, Roland Ilia dhe Lulzim Hamitaj.
KPK deklaroi se gjyqtarja nuk deklaroi pasurinë, pastërtinë e figurës dhe aftësitë profesionale. Në seancën dëgjimore e cila u zhvillua më 1 korrik, KPK tha se ish-kryetarja e Gjykatës së Lartë nuk ka dorëzuar deklaratën e pasurisë pranë ILDKPI-së si dhe nuk ka depozituar as deklaratën e pastërtisë së figurës. Mosparaqitja e deklaratave, tha KPK, shkakton humbjen e cilësisë së subjektit të rivlerësimit dhe sjell pamundësinë e këtij institucioni për të vijuar hetimet në kuadër të vetingut.
Ndërkohë, Beçaj nëpërmjet avokatit të saj u shpreh se në kohën kur u kërkua plotësimi i deklarimeve, ajo nuk ka ushtruar profesionin e gjyqtares por avokates. Kështu ajo hodhi akuza ndaj KLD se e la atë jashtë sistemit, pasi sipas saj ishte një gjyqtare e pavarur.
Shpresa Beçaj ka përfunduar studimet në drejtësi në vitin 1983 dhe e ka filluar karrierën si gjyqtare nga Gjykata e Gramshit. Ajo u emërua gjyqtare në Tiranë në vitin 1990 ndërsa në vitin 1994 u promovua si gjyqtare e Apelit të Tiranës. Në vitin 2004, Beçaj u dekretua gjyqtare në Gjykatën e Lartë ndërsa 4 vjet më pas u emërua kryetare e kësaj gjykate. Me përfundimin e mandatit në vitin 2013, Beçaj udhëhoqi një betejë ligjore kundër Këshillit të Lartë të Drejtësi për t’u rikthyer në Gjykatën e Apelit të Tiranës dhe e fitoi atë. Megjithatë, vendimi për emërimin e saj në Gjykatën e Apelit u shty deri në vitin 2018.
