Ish-kryetari i KQZ-së, Kristaq Kume në një postim shprehet kundër regjistrimit të partisë ‘Bindja Demokratike’ në zgjedhjet lokale.
Ai thotë se regjistrimi i partisë së Astrit Patozit është bërë në mospajtim të hapur me ligjin, por pa sqaruar më tej rezervat që ka. Kume deklaron se vendimi i fundit i KQZ-së, tregon se ky institucion më shumë se angazhohet për të zbatuar ligjin, kujdeset që vendimi i saj të jetë i përputhur me interesin e partisë.
Bindja Demokratike u pranua dje nga KQZ-ja si pjesëmarrëse në zgjedhjet e 30 qershorit. Klement Zguri votoi kundër, por regjistrimi u mbështet nga 4 anëtarët e tjerë të komisionit. Zguri, i cili është përfaqësues i opozitës, dhe është vënë në detyrë si pasojë e marrëveshjes Rama-Basha në 2017, u shpreh se pavarësisht dëshirës së tij që të marrin pjesë sa më shumë parti, Bindja Demokratike nuk ka qenë një subjekt juridik, para regjistrimit në KQZ.
Postimi i plotë i Kristaq Kumes
Regjistrimi i partisë Bindja Demokratike si subjekt zgjedhor nga KQZ-ja, në mospajtim të hapur me ligjin është një fakt akoma më shumë në mbështetje të domosdoshmërisë për ndërtimin e administratës zgjedhore, përfshirë edhe KQZ-në, jo me përfaqësues të partive politike. Komisionerë të tillë janë “te kapur” nga partia që i propozon deri në masën sa arrijnë edhe deri në mohimin profesional të vehtes.
Në raportet dhe rekomandimet e vëzhguesve ndërkombëtarë dhe atyre vendore por jo vetëm, nevoja për të ndërtuar një administratë zgjedhore sa me pak të ndikueshme nga partitë politike theksohet në mënyre të veçantë. Tre raportet e fundit e theksojnë këtë nevojë duke e renditur rekomandimin përkates ndër rekomandimet prioritare. Angazhimi për zbatimin e tij është i domosdoshëm nëse duam që të hedhim një hap më përpara drejt objektives për të zhvilluar zgjedhje demokratike.
Natyrisht edhe nëse bëhet ky ndryshim ai do të jetë vetëm një zhvillim që , megjithë vlerën dhe efektin e madh qe mund të ketë, nuk mjafton. Por duhet bërë me patjetër, ndryshe kot që harxhohen energji për rregulla më të mira ligjore. Administrata e ndertuar në bazë të propozimeve të partive politike, si tregon edhe ky vendim i fundit i -së , më shumë se sa angazhohet për të zbatuar ligjin, kujdeset që vendimi i saj të jetë i përputhur me interesin e partisë.
