32 vendet e NATO-s emëruan ish-kryeministrin holandez, Mark Rutte si sekretarin e përgjithshëm të tyre, në një kohë vendimtare për aleancën, ndërsa Rusia vazhdon luftën e saj në Ukrainë. Me anë të një postimi në platformën X, Hasani ka uruar Mark Rrutte për postin e ri duke theksuar se roli i tij do të jetë thelbësor në forcimin e mëtejshëm të Aleancës.
“Urime Mark Rutte për marrjen e rolit të Sekretarit të Përgjithshëm të NATO-s. Udhëheqja juaj do të jetë thelbësore në forcimin e mëtejshëm të Aleancës sonë në një kohë vendimtare për unitetin transatlantik, shkruan Igli Hasani në X.
Mark Rutte, zëvendëson Jens Stoltenberg, i cili ka qenë në detyrë për 10 vjet. Në selinë e NATO-s në Bruksel u mbajt një ceremoni zyrtare për dorëzimin e detyrës së Sekretariatit të Përgjithshëm nga Jens Stoltenberg te Rutte.
Në fjalimin e tij në ceremoni, Rutte falënderoi të gjithë aleatët që ia besuan detyrën. Duke iu drejtuar Stoltenbergut, Rutte tha: “Ju keni qenë një Sekretar i Përgjithshëm shembullor. Sot NATO është më e madhe, më e fortë dhe më e bashkuar. Kjo është kryesisht falë lidershipit tuaj. Nga njëra anë, ju keni ngritur pragun (nivelin) për pasardhësin tuaj, por nga ana tjetër ju më keni mundësuar të trashëgoj një Aleancë solide”.
“Jam i vendosur të përgatis NATO-n për sfidat e së ardhmes” deklaroi Rutte i cili tha se prioritetet e tij janë të mbajë NATO-n të fortë, të sigurojë që mbrojtja kolektive të mbetet efektive dhe e besueshme kundër të gjitha kërcënimeve, të bëjë më shumë shpenzime dhe investime për mbrojtjen, të rrisë mbështetjen për Ukrainën dhe ta afrojë atë me NATO-n dhe të punojë për anëtarësimin e saj si dhe të zhvillojë bashkëpunimin me partnerët që ndajnë të njëjtat vlera në rajone si Azia-Paqësori dhe kryesisht Bashkimin Evropian (BE).
Rutte tha se Ukraina duhet të jetë anëtare e NATO-s. “Nuk mund të ketë siguri të përhershme në Evropë pa një Ukrainë të fortë dhe të pavarur”, theksoi ai.
Kreu i ri i NATO-s e përshkroi BE-në si “partner unik dhe themelor” të Aleancës dhe nënvizoi se bashkëpunimi duhet të zhvillohet dhe të vazhdojë.
