Bardh Spahia, ish-kryebashkiaku i Shkodrës, është paraqitur këtë të mërkurë në Gjykatën e Posaçme për një seancë paraprake në lidhje me akuzën e pengimit të ekzekutimit të vendimeve gjyqësore.
SPAK ka nisur hetimet mbi një çështje që nuk lidhet me tendera apo korrupsion, por me një vendim të Spahisë për shkarkimin e drejtorit të Ujësjellësit të Shkodrës, Mark Molla, në korrik 2022. Molla ishte emëruar gjatë kohës kur bashkinë e drejtonte Voltana Ademi.
Sipas hetimeve, Bardh Spahia, në cilësinë e kryetarit të Asamblesë së Përgjithshme të Ujësjellës Kanalizimeve, Shkodër dhe si kryetar i bashkisë, ka firmosur vendimet për lirimin e Mark Mollës dhe emërimin e një administratori të ri.
Këto vendime u kundërshtuan në gjykatë nga Molla, dhe më 19 korrik 2022, Gjykata e Shkodrës urdhëroi pezullimin e tyre, duke kërkuar që Molla të rikthehej në detyrë deri në përfundimin e procesit gjyqësor.
Megjithatë, shtatë ditë pas këtij vendimi, Spahia firmosi tre vendime të tjera me të njëjtin efekt – largimin e Mark Mollës dhe emërimin e administratorit të ri, duke anashkaluar kështu urdhrin e gjykatës.
Sipas SPAK, ky veprim përbën një shkelje të rëndë, pasi moszbatimi i vendimeve gjyqësore cënon shtetin e së drejtës dhe krijon pasiguri juridike.
Në njoftimin e tij, SPAK thekson se organet publike nuk mund të diskutojnë apo interpretojnë vendimet e gjykatave, por duhet thjesht t’i zbatojnë ato.
