Mikel Zaho, ish-jurist i Kadastrës së Durrësit, është arrestuar për herë të tretë në 5 vitet e fundit, i akuzuar për shpërdorim detyre dhe tjetërsim të pronave në bregdet.
Hetimet kanë zbuluar një skemë për përfitimin e paligjshëm të 151,000 m² tokë në Spitallë, nisur në vitin 2019.
Zaho dyshohet se ka manipuluar dokumentacionin për të regjistruar tokën në favor të palëve të treta, ndërsa toka më pas është shitur përmes dëshmitarëve të rremë.
Rasti filloi në shkurt 2023 pas një denoncimi nga një qytetar, ndërsa në prill u arrestuan 5 persona, përfshirë Ardit Kërtusha, ish-kryetar i FRESSH-it në Durrës.
Procesi i tjetërsimit është firmosur nga zv.regjistruesi i Kadastrës, duke anashkaluar drejtuesin e institucionit.
Zaho ishte në kërkim prej muajit prill, ndërsa Gjykata e Durrësit kishte lëshuar ndaj tij masën e sigurisë “Arrest në burg”.
Përfshirja e një zinxhiri personash në këtë skemë ka ngritur shqetësime të mëdha për korrupsionin dhe abuzimin me pronat publike.
