Ish i burgosuri politik në Jugosllavinë e asaj kohe, Bajrush Xhemajli, ka bërë një deklaratë duke rikujtuar atë periudhë të errët për Kosovën.
Xhemajli ka folur rreth torturave që ka kaluar në burg gjatë viteve 90’-të.
Dëshmitar i asaj kohe, Xhemajli, ka treguar për një rast, kur gjatë luftës së Kosovës, në burgun e Mitrovicës ku po kryente dënimin, kishte ardhur për vizitë kreu i paramilitarëve çetnik serb Zhetko Razhnatoviç, i njohur ndryshe si Arkani, së bashku me ushtarët.
“Kur erdhën të na vizitojnë, mua më thanë që Arkani ka ardhur t’i marrë ushtarët e tij nga këtu, kështu që nëse dëshiron të shkosh në luftë po të lirojmë. Unë i kam thënë se nuk luftoj kundër popullit tim, aty reaguan keq ata ndërsa Arkani vetëm qeshte”, ka deklaruar Xhemajli.
Ndër të tjera Xhemajli tha se pas vizitës së Arkanit (Tigrit), ka përjetuar dhunë fizike nga gardianët e burgut të Mitrovicës, për përgjigjen e dhënë./GazetaReforma.com/
