Të paktën 14 persona kanë humbur jetën dhe 750 të tjerë janë plagosur pas një shpërthimi të fuqishëm në portin Bandar Abbas në jugperëndim të Iranit, raportojnë mediat zyrtare iraniane duke cituar Ministrinë e Brendshme.
Sipas raportimit të CNN, shpërthimi ndodhi në pjesën Shahid Rajaee të kompleksit portual, duke shkaktuar një shtëllungë të madhe tymi. Autoritetet iraniane bëjnë të ditur se ngjarja mund të jetë e lidhur me magazinimin e kimikateve në port.
Ministri i Brendshëm i Iranit, Eskandar Momeni, tha se gjashtë persona ende rezultojnë të zhdukur, ndërsa zjarrfikësit vazhdojnë përpjekjet për të shuar flakët, përballë sfidave të mëdha të shkaktuara nga erërat e forta.
Deri më tani nuk është dhënë asnjë arsye zyrtare për shpërthimin. Një zëdhënëse e qeverisë, Fatemeh Mohajerani, deklaroi se do të nevojitet kohë për të përcaktuar shkakun e saktë, duke shtuar: “Por deri më tani ajo që është përcaktuar është se kontejnerët ishin ruajtur në një cep të portit që ka të ngjarë të përmbante kimikate që shpërthyen.”
