Në Xhaminë e Shahit në Teheran, një nga objektet më të shenjta për myslimanët shiitë, është ngritur flamuri i kuq, një akt i rrallë që bart mesazhe të forta simbolike dhe historike.
Flamuri lidhet ngushtë me kujtimin e Imam Huseinit, nipit të Profetit Muhamed, i cili u vra në betejën e Karbalasë në vitin 680. Në traditën shiite, ky flamur përfaqëson padrejtësinë dhe thirrjen për hakmarrje.
Ngritja e flamurit të kuq nuk ndodh shpesh dhe zakonisht përdoret si paralajmërim për përgjigje të ashpër në raste të krizave madhore. Kësaj radhe, akti vjen në vazhdën e një përshkallëzimi të rrezikshëm: sulmit izraelit ndaj infrastrukturës bërthamore të Iranit.
Analistët e shohin këtë si një sinjal të qartë se autoritetet iraniane janë gati për një kundërpërgjigje ushtarake.
Edhe udhëheqësi suprem i Iranit, Ajatollah Ali Khamenei, nuk e fshehu tonin e tij kërcënues në një deklaratë publike:
“Izraeli duhet të presë një ndëshkim të rëndë. Ata kanë kryer një krim ndaj vendit tonë dhe nuk do të mbeten pa përgjigje.”
Khamenei vijoi më tej duke paralajmëruar pasoja serioze:
“Me këtë akt, regjimi sionist i ka hapur vetes një rrugë të errët, të dhimbshme dhe të pashmangshme.”
Ky zhvillim e vendos rajonin në një gjendje alarmi të lartë, me tensione që po rriten nga dita në ditë. Flamuri i kuq, i cili valëvitet mbi xhaminë në zemër të Teheranit, është tani më shumë se një simbol fetar, është një mesazh politik dhe ushtarak.
