Stafi teknik i Interit është para një dileme: të tentojë kthimin e Lukakut për ndeshjen me Atalantën apo duhet t’i japë më shumë kohë sulmuesit për t’u rikuperuar, duke shmangur kështu edhe “shtrydhjen” e tij me përfaqësuesen e Belgjikës?
Në fakt, përgjigjja duhet të vijë nga vetë Lukaku, i vetmi që e di me të vërtetë gjendjen e atij muskuli që e detyroi të humbasë Parmën dhe Realin. Këtë të enjte ai ishte në Appiano, bashkë me Vecinon dhe Sensin, ndërsa pjesa tjetër e grupit ishte pushim. Gjithsesi, përgjigjja e saktë mbi gjendjen e tij fizike do të merret pas seancave stërvitore të premten dhe të shtunën.
Duke pasur parasysh periudhën që sigurisht nuk ishte rozë për zikaltrit dhe koeficientin e lartë të vështirësisë së ndeshjes Bergamo, të kesh dikë si Lukaku në dispozicion nuk është një gjë e vogël. Rëndësia e qendërsulmuesit bleg është e padiskutueshme, por është edhe rreziku i aktivizimit të parakohshëm, që mund të kishte pasoja edhe më të rënda.
Në fund të fundit, në Madrid Interi tregoi se problemi nuk është aq shumë faza sulmuese (për më tepër, rikuperimi i Sanchez i ofron Contes një kartë më shumë për të luajtur) sesa mbrojtja. Golat e pësuar, si rezultat i gabimeve individuale dhe kolektive, tani janë një zakon i pakëndshëm në këtë fillim zhgënjyes të sezonit. Në çdo rast, fjala e fundit do t’i mbetet Lukaku. Do të jetë ai që do të thotë, siç ka kërkuar vetë Conte në mënyrë të përsëritur, duke dashur t’i bëjë përgjegjës lojtarët e tij, nëse ndihet i gatshëm për të dhënë kontribut për ndeshjen me Atalantën.
