Policia e Fierit ka arrestuar një 30-vjeçar me profesion avokat, pasi inskenonte sikur persona të ndryshëm do të arrestoheshin pas kallëzimeve që nuk përmbanin elementë të veprës penale.
Në këtë mënyrë, përmes mashtrimit, ai bënte që njerëzit të merrnin avokat ndonëse nuk ishte nevoja.
Bëhet fjalë për shtetasin e identifikuar si Klaudio Xhymerti,banues në Fier, i cili u arrestua pasi Gjykata e Shkallës së Parë për Korrupsionin dhe Krimin e Organizuar Tiranë, më 8 janar 2020, ka caktuar masën e sigurisë “Arrest në burg”.
I riu akuzohet për 2 vepra penale: “Korrupsion pasiv” dhe “Ushtrim i ndikimit të paligjshëm ndaj personave që ushtrojnë funksione publike”.
Po ashtu, ai ka bashkëpunuar edhe me 2 efektivë të policisë ,nënkomisarin Marjon Hasanbasha, 32 vjeç, me detyrë Specialist i Krimeve pranë Komisariatit të Policisë Fier dhe nënkomisar Erjon Muhaj, 34 vjeç, me detyrë Specialist i Krimeve, pranë Komisariatit të Policisë Fier.
Disa kohë më parë të 3 ishin arrestuar nga policia, mirëpo Gjykata e Fierit kishte vendosur për lirimin e tyre nga burgu, ndërsa çështja ishte dërguar në Gjykatën e Apelit në Vlorë.
Kjo e fundit vendosi se ndaj avokatit duhet masë arresti me burg, vendim i cili u ekzekutua sot nga policia, ndërsa 30-vjeçari do të hetohet më tej nga SPAK.
