Ditën e sotme kryeministri Edi Rama ka prezantuar në një takim në Kryeministri drejtoreshën e re të Tatimeve, Delina Ibrahimajn.
Në këtë takim, kryeministri Rama është treguar i ashpër me drejtorinë e Tatimeve. Ai ka thënë se dhënia apo marrja e kuponeve tatimore është rikthyer në nivele shumë të ulta, më keq sesa ka qenë më përpara se të niste lufta e informalitetit.
“Është rritur informaliteti, kush nuk ka rezultat, do të largohet nga sistemi. Me keqardhje vërejmë se janë rikthyer fenomenet e dikurshme të mosdhënies së kuponave”, deklaroi kryeministri Rama.
Këtu ai njoftoi edhe ndryshimin se kush do të vihej në krye të drejtorisë së Tatimeve.
“A ma thotë dot dikush nga ju si mundet që të kemi 15 mijë kasa joraportuese në biznese që figurojnë jo aktive, nga 112 mijë të tilla. Kush e mban përgjegjësinë për këtë, kujt i kërkohet çdo ditë përgjegjësia për këtë.
Kush i mbulon në territor këto pika të kuqe alarmi, dhe si mundet që të vijë dita dhe muaji i ri dhe këto vija të mbeten të kuqe. Pse nuk gjobiten kompanitë e kasave?”, u shpreh mes të tjerave Rama.
Besohet se kjo është edhe arsyeja se përse do jetë shkarkuar ish-drejtori i Tatimeve, Enton Duro. Ky i fundit nuk ndenji as 4 muaj plotësisht në postin e drejtorit të Tatimeve.
Theksohet se në takimin e sotëm kryeministri Rama u tregua i ashpër për arsyen e mungesës së bashkëpunimit mes drejtorisë së Tatimeve dhe atë të Doganave, duke theksuar këtu informalitetin në fushën e karburanteve dhe cigareve.
